Bashkimi Europian po përgatit paketën më gjithëpërfshirëse të masave për mbrojtjen e të miturve në hapësirën digjitale, të njohur si “EU Kids Act”. Sipas dokumenteve të siguruara, nisma synon të vendosë rregulla të përbashkëta për të shmangur fragmentimin e legjislacionit mes vendeve anëtare, të cilat po ndërmarrin nisma të pavarura në këtë drejtim.
Projektligji, që pritet të publikohet zyrtarisht të enjten, do të prezantohet nga Presidentja e Komisionit Europian, Ursula von der Leyen, dhe Komisionerja për Teknologjinë, Henna Virkunen. Masa kryesore parashikon që fëmijët nën 15 vjeç nuk do të mund të krijojnë llogari në rrjete sociale apo platforma videosh pa pëlqimin e prindërve. Për zbatimin e kësaj, kompanitë teknologjike si Meta dhe Google do të obligohen të integrojnë mekanizma për verifikimin e moshës.
Sipas qasjes së shkallëzuar të draftit:
• Fëmijët nën 3 vjeç do të kenë akses të ndaluar në këto shërbime.
• Grupmosha 3 deri në 13 vjeç do të lejohet të përdorë vetëm platforma të përshtatura, nën mbikëqyrjen e të rriturve.
• Të miturit 13 deri në 15 vjeç do të kenë qasje të kufizuar, me kontrolle prindërore dhe funksionalitete të reduktuara.
Përveç rrjeteve sociale, fusha e zbatimit përfshin edhe videolojërat dhe sistemet e inteligjencës artificiale, të cilat shihen si të rrezikshme për zhvillimin personal dhe shëndetin mendor të fëmijëve. Drafti kërkon që siguria të jetë e integruar që në fazën e projektimit (“safety by design”), duke ndaluar funksione si “scroll-i i pafund”, njoftimet artificiale dhe algoritmet që nxisin përdorimin e vazhdueshëm. Nga këto rregulla do të përjashtohen sistemet e destinuara për përdorim arsimor, zyrtar ose industrial.
Përditësime
Presidentja e Komisionit Evropian, Ursula von der Leyen, pritet të prezantojë nismën gjatë fjalimit për Gjendjen e Bashkimit Evropian. Drafti zyrtar do të publikohet këtë të enjte. Rregullorja parashikon që të miturit nga 15 deri në 18 vjeç të përdorin platformat pa miratim prindëror, ndonëse kompanitë do të mbajnë përgjegjësi strikte për sigurinë. Verifikimi i moshës do të kryhet përmes një aplikacioni të përbashkët evropian ose zgjidhjeve teknike të miratuara në nivel kombëtar.
Presidentja e Komisionit Evropian, Ursula von der Leyen, konfirmoi zyrtarisht në Strasburg parametrat e reja të moshës për përdorimin e rrjeteve sociale. Rregullorja përcakton moshën 13 vjeç si pragun minimal për qasje në rrjetet sociale me mbikëqyrje prindërore. Përdoruesit mund të hapin llogari personale vetëm pasi të mbushin 15 vjeç. Propozimi tani i nënshtrohet shqyrtimit në Parlamentin Evropian dhe nga vendet anëtare, një proces legjislativ që pritet të zgjasë me muaj ose vite për shkak të amendamenteve të mundshme.
Komisioni Evropian zyrtarizoi emërtimin e draft-rregullores si Kids Act. Sipas legjislacionit të ri, përdorimi i 'mini-llogarive' për përdoruesit e moshës 13-14 vjeç do të kufizohet në vetëm një orë në ditë. Drafti zhvendos barrën e provës për sigurinë e platformave drejtpërdrejt te kompanitë teknologjike. Presidentja e Komisionit Evropian, Ursula von der Leyen, deklaroi se 'fuqia e pakontrolluar e Big Tech nuk mund të jetë më mbi sigurinë e fëmijëve tanë'.