Elisa Spiropali, ministre për Europën dhe Punët e Jashtme e Shqipërisë, ka nisur më 25 shkurt 2026 vizitën e saj zyrtare në Kosovë nga Prekazi, ku kryen homazhe në Kompleksin Memorial “Adem Jashari”.
Ajo u shoqërua nga zëvendëskryeministri i parë dhe ministri për Punët e Jashtme dhe Diasporën i Kosovës, Glauk Konjufca. Të dy ministrat u përulën para varreve në kompleksin memorial, ku sakrifica e familjes Jashari u bë themel i shtetit të Kosovës.
Pas homazheve, ata u pritën në Kullën e Jasharajve nga Bacë Rifat Jashari. Sipas Spiropalit, kjo kullë është dëshmi se liria ka pasur çmim të paguar me jetë.
Në një postim në rrjetet sociale, Spiropali shkroi:
📍Prekaz | 🇦🇱🇽🇰 Ka vende ku fjalët bëhen të vogla. Sot, bashkë me Zëvendëskryeministrin e Parë dhe Ministrin për Punët e Jashtme dhe Diasporën, Glauk Konjufca, u përulëm në Kompleksin Memorial “Adem Jashari”, aty ku sakrifica e një familjeje u kthye në themel të një shteti. Në Prekaz nuk përkujtohet vetëm një betejë. Përkujtohet vendimi për të mos u dorëzuar. Kulla e Jasharajve, ku u pritëm prej Bacë Rifat Jasharit, nuk është thjesht monument. Është dëshmi se liria ka pasur çmim – dhe ai çmim është paguar me jetë. Këtu ndjen peshën e historisë, por edhe përgjegjësinë e së ardhmes. Liria nuk është trashëgimi automatike. Ajo kërkon dinjitet, unitet dhe drejtësi çdo ditë. Prekazi nuk na kërkon lot. Na kërkon të jemi të denjë.