Elisa Spiropali, deputete e Partisë Socialiste, ka reaguar në rrjetet sociale pas diskutimeve për përplasjen në mbledhjen e qeverisë dhe grupit parlamentar të PS-së, si dhe mungesës së saj në Kuvend gjatë votimit për imunitetin e Belinda Ballukut.
Sipas raportimeve mediatike, përplasja nisi me një shkëmbim replikash mes Spiropalis dhe ministres Erjona Ismaili, duke vazhduar me tension me kryeministrin Edi Rama. Mediat përmendin fraza si “Mbylle gojën!”, “Mos më provoko se të nxjerr jashtë!” ose “Mos më detyro të të nxjerr jashtë!”, të shqiptuara nga Rama ndaj Spiropalis.
Në postimin e saj, Spiropali shkruan se ka ditë që flasin për të në emisione dhe forume me interpretime të pabaza. Ajo sqaron: “Heshtja ime nuk është mungesë përgjigjeje, është një kufi i vendosur mes asaj që duhet thënë dhe asaj që duhet kuptuar”.
Ajo e zgjeron reflektimin përtej rastit personal: “Ajo që po ndodh nuk është thjesht një çështje personale, por një shfaqje e një modeli që po zgjerohet me një normalitet të heshtur, ku arroganca dhe abuzimi nuk paraqiten më si devijime, por si forma të pranueshme shoqërore”. Ky model ndërton një kulturë ku bindja konsiderohet virtyt dhe përshtatja shpërblehet më shumë se merita, duke e kthyer politikën në strukturë të mbyllur.
Spiropali ngrit shqetësim për shtypjen e debatit: “Debati nuk zhduket, ai shtypet, dhe kur shtypet, nuk krijon qetësi, por grumbullim të padukshëm tensioni”. Meritokracia përmendet si parim, por nuk funksionon si praktikë, sepse kërkon drejtësi pa kompromise me rehatinë e pushtetit. Frika ndihet në mënyrë të heshtur dhe njerëzit masin fjalët për pasojat.
Ajo përfundon: “Fitorja nuk merret, ajo provohet. Meritohet kur njerëzit nuk të ndjekin nga frika, por të besojnë nga bindja, dhe kur largohesh, mbetet respekti, jo vetëm rezultati”.