Ministrja për Europën dhe Punët e Jashtme, Elisa Spiropali, po merr pjesë në Takimin e Ministrave të Jashtëm të Platformës për Paqe Ballkanike në Stamboll, me ftesë të homologut të saj, Ministrit të Jashtëm të Republikës së Turqisë, Hakan Fidan.
Platforma fokusohet në avancimin e bashkëpunimit rajonal për ndërlidhjen, zhvillimin ekonomik, sigurinë energjetike, integrimin europian dhe paqen rajonale.
Gjatë takimit, Spiropali njoftoi se “në cilësinë edhe të Anëtarit të Bordit Ekzekutiv të Paqes, kolegu Fidan prezantoi rëndësinë e këtij mekanizmi të ri të krijuar nga Presidenti Trump për ndërtimin e paqes së qëndrueshme në një kohë sfidash”. Ajo shtoi se “Shqipëria është gjithashtu gati për të marrë përgjegjësitë e saj si Anëtar Themelues i Bordit të Paqes”.
Sipas Spiropalit, bashkëpunimi me aleatët strategjikë, si Shtetet e Bashkuara të Amerikës dhe partnerë të tjerë, do të çelë një kapitull të ri në historinë e zgjidhjes së konflikteve ndërkombëtare.
Më herët, Spiropali zhvilloi një takim me Ministrin Fidan për partneritetin strategjik në rritje mes Shqipërisë dhe Turqisë. Ky bashkëpunim do të marrë peshë të re me takimin e tretë të Këshillit të Nivelit të Lartë për bashkëpunimin ndërsektorial midis dy vendeve gjatë këtij viti.
Përditësime
- Shqipëria dhe Kosova janë ftuar të jenë pjesë e Bordit të Paqes për Rindërtimin e Gazës.
- Spiropali pritet të takohet me Presidentin Recep Tayyip Erdoğan në Turqi.