Elisa Spiropali, ministre për Europën dhe Punët e Jashtme, vizitoi mëngjesin e 3 shkurt 2026 Shtëpinë e Bardhë në Washington të Shteteve të Bashkuara të Amerikës.
Ajo u prit nga Charles McLaughlin, asistent special i Presidentit Trump, i cili njëkohësisht mban detyrën e drejtorit të lartë për Europën dhe Rusinë në Këshillin e Sigurisë Kombëtare.
Takimi u fokusua në potencialin e thellimit të partneritetit strategjik midis Shqipërisë dhe SHBA-së, me theks të veçantë te roli i ri i Shqipërisë si anëtare-themeluese e Bordit të Paqes.
Sipas Spiropalisë, përfaqësimi nga Kryeministri Edi Rama në këtë iniciativë të Presidentit Trump ripozicionon Shqipërinë si kontributore aktive në çështjet e sigurisë dhe paqes, duke dhënë një përmasë të re bashkëpunimit me aleatin historik SHBA.
Ministrja theksoi se bashkë me McLaughlin ndau bindjen se Bordi i Paqes do të jetë në thelb Bordi i Veprimit, një iniciativë e drejtuar nga parimet për zgjidhjen e qëndrueshme të konflikteve.
Spiropali njoftoi se Shqipëria është e nderuar të jetë anëtare inauguruese e Forcës Ndërkombëtare të Stabilizimit (ISF), në linjë me planin 20-pikësh të Presidentit Trump për Gazën, si vend që eksporton stabilitet dhe siguri.
Gjatë takimit, ajo konfirmoi gatishmërinë e Shqipërisë për mbajtjen e sesionit të dytë të Dialogut Strategjik, që do të forcojë marrëdhëniet në sektorët ekonomikë, tregtarë, energjitikë dhe zhvillimorë.
Përditësime
Ambasadori i Shqipërisë në SHBA, Ervin Bushati, mori pjesë në takimin në Shtëpinë e Bardhë.