Ministrja për Europën dhe Punët e Jashtme, Elisa Spiropali, zhvilloi më 10 shkurt një takim në Washington me nënsekretaren e Shtetit për Çështjet Politike, Allison Hooker, përgjegjëse për marrëdhëniet politike të SHBA-ve me aleatët në botë.
Në fokus të takimit ishin çështjet që prekin drejtpërdrejt interesat e Shqipërisë: siguria në kuadër të NATO-s, stabiliteti në Ballkanin Perëndimor, si dhe hapat konkretë për thellimin e partneritetit ekonomik dhe strategjik midis dy vendeve. Këto masa shërbejnë si garanci që zëri i Shqipërisë dëgjohet aty ku merren vendimet.
Në një postim në Facebook, Spiropali shkroi: “Shqipëria sot trajtohet si një aleate e besueshme, që qëndron krah partnerëve të saj dhe kontribuon realisht për sigurinë dhe stabilitetin e rajonit. Partneriteti ynë me SHBA-të nuk është çështje protokolli apo fotografie. Është një marrëdhënie e ndërtuar mbi interesa, vlera dhe përgjegjësi të përbashkëta”.
Postimi i plotë: “Në Washington zhvillova një takim përmbajtësor me Nënsekretaren e Shtetit për Çështjet Politike, Allison Hooker, përgjegjëse për marrëdhëniet politike të SHBA-ve me aleatët në mbarë botën. Folëm për çështjet që prekin drejtpërdrejt interesat e Shqipërisë: sigurinë në kuadër të NATO-s, stabilitetin në Ballkanin Perëndimor, si dhe hapat konkretë për thellimin e partneritetit ekonomik e strategjik mes dy vendeve”.
Sipas një burimi, Spiropali zhvilloi javën e kaluar vizitë në Washington, ku pati edhe takime në Kongresin Amerikan për thellimin e bashkëpunimit mes Shqipërisë dhe SHBA-ve.