Ministrja për Europën dhe Punët e Jashtme të Shqipërisë, Elisa Spiropali, gjatë vizitës së saj zyrtare në Prishtinë, u takua me kryetarët e partive kryesore parlamentare të Kosovës.
Ajo u prit nga kryetari i Partisë Demokratike të Kosovës (PDK), Bedri Hamza, të cilin e uroi për zgjedhjen në krye të partisë. Spiropali vlerësoi rolin historik dhe politik të PDK-së në mbrojtjen e kauzës së lirisë dhe drejtësisë. Ministrja theksoi se Shqipëria mbetet pranë Kosovës në respekt të diversitetit politik, por me bindjen se forcimi i institucioneve të Kosovës është forcim i faktorit shqiptar në rajon.
Në takim me kryetarin e Lëvizjes Demokratike të Kosovës (LDK), Lumir Abdixhiku, Spiropali deklaroi se LDK-ja ka rol të rëndësishëm në historinë e shtetformimit të Kosovës dhe në arkitekturën e saj demokratike. Ajo kujtoi Presidentin historik Ibrahim Rugovan, vizioni i të cilit për rezistencë, orientim euroatlantik dhe shtetësi të ndërtuar mbi kulturën e dialogut mbetet themel moral dhe politik i Kosovës moderne. Kontributi i LDK-së në debat, reformë dhe konsolidim institucional është pjesë e pluralizmit që e bën demokracinë funksionale.
Spiropali u takua gjithashtu me kryetarin e Aleancës për Ardhmërinë e Kosovës (AAK), Ramush Haradinajin, të cilin e konsideroi një prej zërave më të fortë dhe të qartë të orientimit euroatlantik të Kosovës në momente të vështira dhe në faza vendimtare për shtetin. Gjatë takimit në zyrat e AAK-së, mbrëmjen e së mërkurës, biseduan për përgjegjësinë e forcave politike për të garantuar stabilitetin institucional, për të forcuar partneritetin strategjik Shqipëri-Kosovë dhe për të avancuar integrimin euroatlantik të rajonit. Siguria mbetet boshti themelor i këtij vizioni, me rolin e NATO-s në Kosovë dhe koordinimin me aleatët si garanci për paqen dhe stabilitetin afatgjatë. Shqipëria dhe Kosova duhet të punojnë krah për krah për sigurinë kombëtare, aleancat strategjike dhe konsolidimin ndërkombëtar.
Spiropali përgëzoi kontributin konstruktiv të partive politike në krijimin pa vonesë të institucioneve të reja, duke vlerësuar stabilitetin institucional të Kosovës si interes të përbashkët.