Ramush Haradinaj, kryetar i Aleancës për Ardhmërinë e Kosovës dhe ish-kryeministër, u takua me ministrën për Evropë dhe Punë të Jashtme të Shqipërisë, Elisa Spiropali, në Prishtinë. Takimi u zhvillua gjatë vizitës së Spiropalit në Kosovë dhe u bë publik nga vetë Haradinaj në rrjetet sociale, bashkë me pamje nga biseda.
Gjatë takimit, Haradinaj vlerësoi angazhimin e Qeverisë shqiptare në çështjet e rëndësishme për Kosovën. Palët diskutuan zhvillimet në Kosovë, Shqipëri dhe rajon, si dhe proceset e ardhshme, veçanërisht ato që lidhen me sigurinë dhe integrimin euroatlantik, me synim strategjik anëtarësimin në NATO.
Ai theksoi forcimin e marrëdhënieve bilaterale ndërmjet Kosovës dhe Shqipërisë si prioritet të përhershëm, ndërsa integrimin ndërshqiptar e cilësoi domosdoshmëri kombëtare dhe garanci për një të ardhme të sigurt.
Haradinaj shprehu falënderim për kujdesin dhe përkushtimin e Qeverisë shqiptare, të udhëhequr nga kryeministri Edi Rama, ndaj çlirimtarëve të UÇK-së që po përballen me proceset gjyqësore në Hagë.