Ministri për Evropën dhe Punët e Jashtme, Ferit Hoxha, zhvilloi një vizitë zyrtare në Prishtinë, ku u takua me drejtuesit e forcave kryesore politike për të diskutuar mbi zhvillimet aktuale dhe sfidat institucionale në Kosovë.
Në selinë e Aleancës për Ardhmërinë e Kosovës (AAK), ministri Hoxha u takua me kryetarin e ri, Ardian Gjini, të cilin e uroi për detyrën. Gjatë takimit, ai shprehu vlerësimin për kontributin e ish-kryetarit Ramush Haradinaj në avancimin e agjendës shtetërore dhe rrugëtimin euroatlantik të vendit. Po ashtu, Hoxha zhvilloi një takim me kryetarin e Partisë Demokratike të Kosovës (PDK), Bedri Hamza, me të cilin diskutoi mbi sfidat politike dhe nevojën për ndërtimin e konsensusit.
Sipas ministrit, partitë politike në Kosovë duhet të luajnë një rol konstruktiv për të mundësuar konstituimin e shpejtë të institucioneve të reja. Ai nënvizoi se dialogu ndërmjet Kosovës dhe Serbisë mbetet rruga e vetme për normalizimin e marrëdhënieve, forcimin e paqes dhe përparimin në rrugën drejt Bashkimit Evropian.
Diskutimet përfshinë gjithashtu zhvillimet lidhur me proceset gjyqësore ndaj ish-drejtuesve të Ushtrisë Çlirimtare të Kosovës (UÇK). Ministri Hoxha shprehu respekt për rolin e tyre historik dhe theksoi pritshmërinë që proceset gjyqësore të zhvillohen në përputhje me standardet ndërkombëtare të drejtësisë. Hoxha ripohoi mbështetjen e palëkundur të Shqipërisë për forcimin e subjektivitetit ndërkombëtar të Kosovës dhe stabilitetin rajonal.
Përditësime
Ministri Hoxha zhvilloi një takim me nënkryetarin e LDK-së, Lutfi Haziri. Ministri vlerësoi kontributin e LDK-së dhe vizionin e Ibrahim Rugovës. Përmes platformës 'X', Hoxha bëri thirrje për maturi dhe përgjegjësi në këtë fazë të proceseve politike.