Ministri për Europën dhe Punët e Jashtme, Ferit Hoxha, zhvilloi një takim me Ministrin e Punëve të Jashtme të Serbisë, Marko Đurić, në kuadër të Forumit Diplomatik të Antalias 2026.
Hoxha njoftuan për takimin me anë të një postimi në rrjetet sociale. Diskutimi u përqendrua në avancimin e marrëdhënieve dypalëshe përmes dialogut konstruktiv dhe bashkëpunimit konkret. Palët synuan forcimin e lidhjeve ekonomike dhe tregtare, duke vlerësuar rolin e tyre në zhvillimin e qëndrueshëm dhe stabilitetin rajonal.
Hoxha mirëpriti gatishmërinë e Serbisë për t’u përgjigjur pozitivisht kërkesës shqiptare për hapjen e një Konsullate të Përgjithshme në Bujanoc. Ai nënvizoi domosdoshmërinë për të ruajtur, thelluar dhe forcuar bashkëpunimin rajonal si rrugën më të besueshme drejt një të ardhmeje të përbashkët. Hoxha u shpreh se Shqipëria do të lërë mënjanë retorikat e panevojshme dhe joproduktive, duke u përkushtuar ndaj qartësisë së qëndrimeve, koherencës së politikës së jashtme, forcimit të kontakteve mes njerëzve dhe kultivimit të një brezi të ri me vizion evropian.
Palët pranuan se kanë qëndrime thelbësisht të ndryshme lidhur me Republikën e Kosovës. Hoxha rikonfirmoi qëndrimin e palëkundur të Shqipërisë për rëndësinë vendimtare të dialogut ndërmjet Kosovës dhe Serbisë, të ndërmjetësuar nga Bashkimi Evropian. Ai e cilësoi këtë dialog si rrugën e vetme të qëndrueshme drejt normalizimit të plotë të marrëdhënieve dhe njohjes reciproke, si kontribut thelbësor për paqen e qëndrueshme dhe stabilitetin afatgjatë në rajon.