Ministri për Evropën dhe Punët e Jashtme, Ferit Hoxha, ka reaguar pas përfundimit të zgjedhjeve parlamentare në Kosovë. Përmes një deklarate të publikuar në rrjetin social X, ministri Hoxha ka vlerësuar lart pjekurinë demokratike dhe përgjegjshmërinë e dëshmuar nga qytetarët, institucionet përgjegjëse për administrimin e procesit, si dhe subjektet politike pjesëmarrëse.
Kreu i diplomacisë shqiptare theksoi se institucionet e reja, që do të burojnë nga vullneti i zgjedhësve, janë thelbësore për vazhdimin e bashkëpunimit të ngushtë ndërmjet Shqipërisë dhe Kosovës.
"Ne presim me shumë interes formimin e institucioneve të reja, për të vazhduar bashkëpunimin e ngushtë, forcimin e mëtejshëm të marrëdhënieve tona të gjithanshme në të mirë të interesave tona reciproke dhe të përbashkëta, si dhe për avancimin në rrugëtimin drejt së ardhmes sonë të përbashkët evropiane dhe euroatlantike", shprehet Hoxha në mesazhin e tij.