Në Konferencën e Sigurisë në Mynih, ministrja për Evropën dhe Punët e Jashtme, Elisa Spiropali, u takua me kryeministrin e Bavarisë, Markus Söder, dhe ministrin për Europën, Eric Beißwenger.
Në takimin me dy zyrtarët e lartë u rikonfirmua partneriteti mes Shqipërisë dhe Bavarisë, ndërsa qeveria bavareze shprehu mbështetje për anëtarësimin e Shqipërisë në Bashkimin Evropian.
Fokusi i takimit ishte edhe bashkëpunimi ekonomik, me theks në rritjen e investimeve bavareze në Shqipëri. Ministrja Spiropali theksoi prezencën e zyrës bavareze të tregtisë në Tiranë si faktor kyç për forcimin e marrëdhënieve ekonomike.
Në një postim në rrjetet sociale, Spiropali shkroi: "Mynih | Me Kryeministrin e Bavarisë Markus Söder dhe Ministrin për Europën Eric Beißwenger, rikonfirmuam partneritetin e shkëlqyer mes dy vendeve tona, teksa qeveria bavareze mbështet fort anëtarësimin e Shqipërisë në BE. U angazhuam për forcimin e mëtejshëm të marrëdhënies sonë ekonomike, falë edhe prezencës së zyrës bavareze të tregtisë në Tiranë, me synimin e qartë për nxitjen e investimeve bavareze në vendin tonë."