Televizioni publik zviceran Schweizer Radio und Fernsehen (SRF) i ka kushtuar një artikull situatës politike në Shqipëri dhe vizitës së kryeministrit Edi Rama në Zvicër. Shkak i raportimit ka qenë pjesëmarrja e Ramës në panairin prestigjioz Art Basel, me një vepër të ekspozuar në kuadër të programit "Art Parcours" pranë urës Mittlere Brücke në Bazel.
Media zvicerane thekson se ky udhëtim ka shkaktuar debate në Shqipëri, ku qytetarë dhe përfaqësues të opozitës kanë kritikuar kryeministrin në rrjetet sociale, pas shpërndarjes së videove nga aktiviteti. Si përgjigje ndaj këtyre reagimeve, Rama ka sqaruar se pjesëmarrja e tij ka qenë private, me ftesë të organizatorëve dhe pa përdorur fonde publike.
“Gjatë pothuajse tri dekadave në shërbim publik, nuk kam udhëtuar kurrë privatisht me para shtetërore”, citohet të ketë deklaruar Rama për SRF. Ai shtoi se askush nuk do të gjente në xhepin e tij para të pafituara me ndershmëri, një koment që media zvicerane e lidh me skandalet e korrupsionit të raportuara brenda rrethit të tij politik.
Korrespondenti i SRF, Janis Fahrländer, vlerëson se Rama vazhdon të ndërtojë një imazh si artist jokonformist dhe shpirt i lirë, profil që po përballet me sfida pas 12 viteve në pushtet. Artikulli thekson se kritikat ndaj tij lidhen me perceptimet për tendenca autoritare dhe presione ndaj sistemit të drejtësisë e medias. Nga ana tjetër, organizatorët e Art Basel kanë sqaruar se prezenca e Ramës lidhet ekskluzivisht me aktivitetin e tij artistik dhe nuk përbën mbështetje politike.