Rajoni i Lombardisë në veri të Italisë është përballur me një stuhi të fuqishme breshri, ku madhësia e kokrrave ka arritur deri në 10 centimetra, duke u krahasuar nga banorët me madhësinë e një mandarine. Fenomeni natyror ka shkaktuar dëme të mëdha në infrastrukturë, banesa dhe automjete.
Në qytetin e Castrezzato, pranë Brescias, stuhia ka dëmtuar rëndë fasadat e ndërtesave, automjetet private, si dhe ato të forcave të policisë dhe mbrojtjes civile. Dëme të ngjashme janë regjistruar edhe në qytetin e Chiari, ku raportohen xhama të thyer, çati të dëmtuara dhe panele diellore të shkatërruara. Po ashtu, një stacion zjarrfikësish në zonë është përmbytur, ndërsa pemët e rrëzuara kanë krijuar vështirësi të mëtejshme.
Ndikimi i stuhisë është shtrirë edhe në qytezat e Pontoglios dhe Castelcovatit. Në provincën fqinje të Bergamos, stuhia ka goditur sektorin bujqësor, duke shkaktuar dëme në çati fermash, stalla dhe të mbjella me misër. Pas kësaj, fronti i stuhisë ka vijuar lëvizjen drejt Veronës dhe rajonit të Venetos, duke sjellë erëra të forta dhe reshje të dendura shiu.
Në Milano, autoritetet vendase kanë shpallur alarmin portokalli për shkak të situatës së motit. Si masë parandaluese për garantimin e sigurisë së qytetarëve, janë mbyllur përkohësisht parqet dhe disa pishina publike.