Qarku i Kukësit është përballur këtë pasdite me një stuhi me erëra të forta, e cila ka shkaktuar ndërprerje të furnizimit me energji elektrike. Problematikat më të mëdha janë evidentuar në Bashkinë Has.
Sipas të dhënave nga OSHEE Kukës, ndërprerja e energjisë është shkaktuar nga rrëzimi i shtyllave të tensionit të mesëm në fshatin Nikoliq dhe në Njësinë Administrative Fajzë. Shkak për rrëzimin e linjave të transmetimit është bërë rënia e një lisi për shkak të erërave të fuqishme.
Fatmirësisht, nga kjo ngjarje nuk ka pasur persona të lënduar apo dëme materiale në shtëpitë e banimit, pasi pema është rrëzuar në një zonë livadhi, larg banesave. Aktualisht, ekipet e avarive të OSHEE po punojnë në terren për të riparuar dëmet e shkaktuara dhe për të mundësuar rikthimin e energjisë elektrike për zonat e prekura.