Dhjetëra milionë amerikanë po përgatiten për një stuhi të fortë dimërore që do të shtrihet nga Rrafshnaltat e Mëdha në zonat qendrore deri në metropolet e Bregut Lindor. Shërbimi Kombëtar i Motit (NWS) paralajmëroi se stuhia do të sjellë reshje të dendura dëbore, akumulim të madh akulli dhe temperatura polare me erëra të fuqishme.
Meteorologu Ryan Moy theksoi se dhjetë ditët e ardhshme do të jenë më të këqijat në 40 vitet e fundit. Ai u kërkoi qytetarëve të organizohen, të kujdesen për të nevojshmit dhe të përgatiten për ndërprerje të zgjatura të energjisë elektrike.
Në Teksas, banorët kujtojnë stuhinë e vitit 2021, kur dështimi i rrjetit elektrik la miliona pa energji dhe shkaktoi vdekjen e të paktën 200 personave. Reshje dëbore janë regjistruar tashmë në pjesët veriperëndimore të Teksasit dhe Oklahomës.
Më shumë se 150 milionë amerikanë janë nën paralajmërim, ndërsa 14 shtete dhe Distrikti i Kolumbias kanë shpallur gjendje të jashtëzakonshme. Rreth 1.800 fluturime janë anuluar për të nesërmen, përfshirë 1.200 nga dhe drejt Dallasit në Teksas.
Guvernatorja e Nju Jorkut, Kathy Hochul, u bëri thirrje 20 milionë banorëve të mos e nënvlerësojnë të ftohtin. Ajo paralajmëroi se pesë ose gjashtë minuta jashtë mund të jenë të rrezikshme për shëndetin.