Qeveria suedeze ka kufizuar përdorimin e versioneve të ChatGPT dhe Claude që hapen përmes shfletuesit të internetit në kompjuterët e punës të punonjësve të administratës publike. Masa hyri në fuqi të hënën, më 26 tetor, për shkak të shqetësimeve për sigurinë dhe përpunimin e të dhënave të ndjeshme.
Vendimi pasoi një vlerësim të përdorimit të mjeteve të inteligjencës artificiale nga punonjësit e Administratës Suedeze të Transportit, në fillim të këtij viti. Vlerësimi evidentoi përdorime problematike të platformave gjatë kryerjes së detyrave zyrtare.
Shqetësimi i autoriteteve është se punonjësit mund të fusin informacione konfidenciale në modele pa marrëveshje që përcaktojnë mënyrën e mbrojtjes së të dhënave. Si pasojë, informacioni mund të ruhet ose të përdoret për trajnimin e modeleve. Mikael Wettercrantz, drejtor i dixhitalizimit në Zyrat Qeveritare të Suedisë, tha se përdorimi i platformave që nuk mbulohen nga marrëveshje të tilla, i njohur si “shadow IT”, mund të sjellë pasoja për sigurinë e informacionit.
Si alternativë, autoritetet rekomandojnë Microsoft Copilot. Sipas burimeve, mjeti i është nënshtruar kontrollit të sigurisë dhe mbulohet nga një marrëveshje mes kompanisë dhe qeverisë suedeze për mbrojtjen e të dhënave.
Kufizimi nuk nënkupton ndalimin e inteligjencës artificiale në administratë. Punonjësit mund t’i përdorin këto mjete për detyrat e tyre, por nën kontrolle më të rrepta. Një numër i kufizuar punonjësish do të mund të përdorë ChatGPT dhe Claude përmes një platforme të posaçme për asistentët e inteligjencës artificiale, të zhvilluar nga autoritetet suedeze.
Sipas transmetuesit publik suedez Sveriges Radio, kufizime për përdorimin e ChatGPT dhe Claude janë vendosur edhe në Agjencinë Suedeze të Tatimeve dhe Bordin Kombëtar për Kujdesin Institucional. Autoriteti Suedez i Përmbarimit po e shqyrton çështjen.
ChatGPT dhe Claude i shtohen DeepSeek në listën e mjeteve që qeveria suedeze nuk i ka miratuar për përdorim të zakonshëm, për shkak të shqetësimeve për sigurinë e të dhënave. BoldNews dhe Mapo raportojnë gjithashtu se javën e kaluar Shtetet e Bashkuara njoftuan se do të ndalonin të gjitha produktet dhe shërbimet e kompanisë kineze DeepSeek.