Rreth 20 shkolla në qytetin Borlänge të Suedisë qendrore u mbyllën të hënën, pas kërcënimeve për dhunë ndaj aktiviteteve shkollore, njoftojnë autoritetet lokale.
Bashkia e Borlänge-s mori vendim për mbylljen e 16 shkollave publike si masë parandaluese për të garantuar sigurinë e nxënësve dhe stafit. Ndërkohë, 5 shkolla private vendosën të pezullojnë mësimin.
Policia suedeze ka nisur një hetim paraprak për "kërcënime serioze të paligjshme ndaj një grupi", pas marrjes së informacioneve për kërcënime të drejtuara ndaj shkollave në zonë. Autoritetet theksojnë se është ende herët për të vlerësuar nëse kërcënimi është real apo jo. Shkollat mbeten të mbyllura deri në njoftim të dytë.
Borlänge, me rreth 45 mijë banorë dhe i vendosur rreth 200 kilometra në veri të Stokholm-it, është zonë ku incidentet e tilla janë të rralla.
Suedia ka përjetuar sulme të rënda në institucione arsimore në vitet e fundit:
- Në shkurt 2025, një sulm i armatosur në Örebro la 10 të vdekur në një qendër arsimore për të rritur.
- Në vitin 2022, një nxënës vrau dy mësues në një shkollë në Malmö.
- Në vitin 2015, një sulm me motive raciste në Trollhättan përfundoi me tre viktima.
Hetimet për rastin në Borlänge vijojnë nga autoritetet suedeze.