Në qytetin Bannu të provincës Khyber Pakhtunkhwa, pranë kufirit me Afganistanin, ka ndodhur një sulm kamikaz që mori jetën e 12 efektivëve të policisë dhe plagosi 5 të tjerë. Ngjarja ndodhi në lagjen Fateh Khel, ku një kamikaz shpërtheu një automjet të mbushur me eksploziv në pikën e kontrollit policor.
Sipas autoriteteve lokale, militantë të armatosur sulmuan së pari stacionin e policisë Fateh Khel dhe hapën zjarr ndaj forcave të sigurisë. Oficeri i policisë Muhammad Sajjad Khan deklaroi se 12 efektivë janë konfirmuar të vdekur, ndërsa një tjetër mbetet i zhdukur. Pamjet në rrjetet sociale tregojnë se stacioni është shkatërruar pothuajse plotësisht nga shpërthimi i fuqishëm.
Autoritetet raportuan se militantët ngritën gjithashtu një pritë ndaj forcave që po drejtoheshin për përforcime në zonë, por nuk kanë dhënë detaje të mëtejshme mbi autorët apo organizatën përgjegjëse. Forca shtesë sigurie janë dërguar për të kontrolluar situatën, ndërsa banorët kanë transportuar të plagosurit dhe trupat në spitalin e qytetit.
Zona e Bannu-s është përballur shpesh me sulme të tilla nga grupe militante vitet e fundit.