Komisioni Evropian ka nisur hetimet pas një sulmi kibernetik që ka prekur llogarinë e institucionit në platformën AWS (Amazon Web Services). Incidenti është zbuluar shpejt, para se të shkaktonte dëme të mëdha, sipas burimeve të brendshme të raportuara nga BleepingComputer.
Autori i sulmit ka marrë përgjegjësinë duke kontaktuar BleepingComputer. Ai ka pohuar se ka vjedhur mbi 350 GB të dhëna, duke përfshirë baza të dhënash të ndjeshme dhe informacion për punonjësit e Komisionit. Provat përfshijnë screenshot-e që tregojnë qasje në informacion të brendshëm dhe një server emaili të përdorur nga institucioni. Autori nuk ka zbuluar metodën e depërtimit.
Ai ka deklaruar se nuk synon të shantazhojë Komisionin apo të përdorë të dhënat për qëllime financiare. Në vend të kësaj, planifikon t'i bëjë publike ato në internet në një moment të mëvonshëm.
Ky incident vjen pas një shkeljeje tjetër të sigurisë në muajin shkurt, ku Komisioni kishte zbuluar një problem të sigurisë të ndodhur më 30 janar. Atëherë, platforma e menaxhimit të pajisjeve mobile për stafin e Komisionit ishte komprometuar. Hetimet e mëtejshme tregojnë se sulmi i fundit mund të lidhet me një seri sulmesh të ngjashme ndaj institucioneve të tjera evropiane.