Ngjarja ka ndodhur pasditen e së shtunës, rreth orës 18:00, në zonën e Milotit, pranë Urës së Milotit dhe vendit të njohur si ish-Posta e Policisë. Sipas informacioneve nga grupi hetimor, shtetasi Gj. Gj., i cili udhëtonte me një automjet tip Audi, ka ndjekur nga pas automjetin tip Audi A7, që drejtohej nga 30-vjeçari M. J., banues në Rubik.
Gjatë lëvizjes, autori i dyshuar ka qëlluar disa herë me armë zjarri në drejtim të automjetit ku ndodhej 30-vjeçari. Pavarësisht sulmit, nuk raportohet për persona të dëmtuar. Pas ngjarjes, autori u largua nga vendi i ngjarjes dhe aktualisht shërbimet e Policisë vijojnë kontrollet për lokalizimin dhe kapjen e tij.
Pista kryesore e hetimit përqendrohet në një konflikt familjar. Dyshohet se shkak për përplasjen është bërë divorci i 30-vjeçarit me motrën e autorit të dyshuar. Grupi hetimor, nën drejtimin e Prokurorisë, po punon për dokumentimin e plotë të rrethanave të kësaj ngjarjeje.
Përditësime
Policia e Shtetit konfirmoi se 30-vjeçari M. J. ndodhet jashtë rrezikut për jetën pas sulmit me armë zjarri në Milot. Sipas gazetarit Elvis Hila, detajet e reja nga dosja hetimore kanë sqaruar rrethanat e ngjarjes, ndërsa autoritetet vijojnë operacionin për kapjen e autorit të dyshuar, Gj. Gj.