Një ngjarje me armë zjarri ka ndodhur rreth orës 18:00 të ditës së djeshme, në afërsi të Urës së Milotit, në qarkun e Lezhës. Sipas njoftimit zyrtar të Policisë, shtetasi me inicialet Gj. Gj., i cili lëvizte me një automjet tip “Audi”, dyshohet se ka hapur zjarr në drejtim të një automjeti tjetër, gjithashtu të markës “Audi”, që ishte në lëvizje. Automjeti i shënjestruar drejtohej nga shtetasi M. J., 30 vjeç, banues në Rubik.
Pas verifikimeve të kryera në vendngjarje, autoritetet bënë me dije se nuk ka persona të dëmtuar apo të lënduar nga të shtënat. Shërbimet e Policisë janë vënë menjëherë në ndjekje të autorit të dyshuar, i cili është larguar nga vendngjarja pas incidentit.
Një grup hetimor ndodhet në zonë dhe, nën drejtimin e Prokurorisë, po kryen veprimet e nevojshme procedurale për sqarimin e rrethanave të ngjarjes dhe dokumentimin e plotë ligjor të saj.
Përditësime
Policia e Shtetit konfirmoi se ngjarja ka ndodhur më 1 gusht. Autoritete kanë shpallur në kërkim shtetasin Gj. Gj., i dyshuar si autor i të shtënave me armë zjarri pranë Urës së Milotit.