Pesë ushtarë të ushtrisë libaneze janë plagosur të dielën si pasojë e një sulmi të forcave izraelite në jug të Libanit. Sipas një deklarate zyrtare, ushtarët kanë pësuar lëndime të lehta në qytetin Kafra, në distriktin Bint Jbeil, ndërsa ishin duke shoqëruar civilë me një automjet ushtarak. Ushtria libaneze nuk ka dhënë detaje të mëtejshme mbi rrethanat e ngjarjes, ndërsa deri në këto momente nuk ka pasur asnjë reagim nga ana e ushtrisë izraelite.
Ndërkohë, Agjencia Kombëtare e Lajmeve e Libanit (NNA) raportoi se një dron izraelit ka hedhur një mjet shpërthyes në kryqëzimin e qytetit Srebbine, në të njëjtin distrikt. Ky sulm goditi një automjet civil që po shoqërohej nga mjeti ushtarak, duke shkaktuar plagosjen e disa civilëve që ndodheshin brenda tij.
Sipas raportimeve të mëtejshme, forcat izraelite kanë kryer shpërthime me eksplozivë edhe në qytetin Kounine, në provincën Nabatieh. Zhurmat e këtyre shpërthimeve janë dëgjuar në disa zona të ndryshme të Libanit jugor. Pas mesnatës, shpërthime të tjera u regjistruan pranë qytetit Haddatha. Përveç këtyre incidenteve, është vënë re prania e dronëve izraelitë, të cilët kanë fluturuar mbi kryeqytetin Bejrut dhe zonat e periferisë jugore të tij.