Fluturimet globale janë ndërprerë për shkak të sulmeve në Gjirin Persik. Të dielën, sulmet e vazhdueshme me raketa dhe dronë nga Irani mbajtën të mbyllura aeroportet kryesore të Lindjes së Mesme.
Aeroportet e tranzitit, si ai i Dubait, Abu Dhabit dhe Dohës, u mbyllën ose u kufizuan ndjeshëm. Dubai është qendra ndërkombëtare më e ngarkuar për nga trafiku i pasagjerëve. Pjesa më e madhe e hapësirës ajrore të rajonit mbeti e mbyllur pas sulmeve amerikane dhe izraelite të shtunën, që vranë udhëheqësin suprem iranian Ajatollah Ali Khamenein dhe pjesën më të madhe të udhëheqjes ushtarake të Iranit.
Izraeli njoftua se nisi një valë të re sulmesh ndaj Iranit të dielën. Shpërthime të forta u dëgjuan pranë Dubait dhe mbi Dohën për të dytën ditë radhazi, ndërsa Irani sulmoi shtetet fqinje të Gjirit.
Ndikimi në Dubai
Dubai shërben si qendër turistike dhe tregtare kryesore në Lindjen e Mesme. Aeroporti i tij është një nga më të ngarkuarit në botë dhe bazë për kompaninë Emirates. Kjo kompani pezulloi të gjitha fluturimet për në dhe nga Dubai deri në orën 15:00 sipas kohës lokale të hënës.
Aeroportet e Emirateve të Bashkuara Arabe janë nyje kryesore për fluturimet lidhëse botërore. Vitin e kaluar, ato trajtuan gjithsej 127.7 milionë pasagjerë.
Në Aeroportin Ndërkombëtar të Dubait, një video e verifikuar nga CNN tregon një pasagjer me këmishë të spërkatur me gjak duke vendosur një pecetë në kokë. Të tjerët nxitojnë në traversë, ndërsa një zë thotë: “shkoni në shtëpi, mos qëndroni këtu”.