Futbollisti kosovar Hasan Hyseni ka ndërmarrë një hap të ri në karrierën e tij profesionale, duke u transferuar për herë të parë jashtë kontinentit evropian. Sulmuesi i krahut, i cili ka spikatur ndër vite në kampionatin vendor, ka nënshkruar të mërkurën me klubin FC Asia, që militon në elitën e futbollit të Kirgistanit.
Klubi aziatik e ka mirëpritur zyrtarisht afrimin e 29-vjeçarit, duke shprehur besimin se kontributi i tij do të jetë i rëndësishëm për pjesën e mbetur të sezonit. Në njoftimin e tyre, drejtuesit e skuadrës kanë theksuar: “Jemi të kënaqur të mirëpresim një sulmues nga Kosova. I urojmë Hysenit ndeshje emocionuese, paraqitje të sigurta, gola të bukur dhe fitore të mëdha me ekipin tonë”.
FC Asia vlerësohet si një prej ekipeve më konkurruese në kampionatin kirgiz. Aktualisht, skuadra pozicionohet në vendin e pestë me 33 pikë të grumbulluara pas 16 ndeshjeve, ndërsa diferenca me vendin e parë, i cili ka 38 pikë, mbetet e ngushtë. Lojtari nga Mitrovica pritet të jetë i gatshëm për të debutuar që në ndeshjen e radhës, e cila zhvillohet këtë fundjavë.
Para këtij transferimi, Hasan Hyseni ka qenë pjesë e klubit të Llapit. Gjatë karrierës së tij të mëparshme, ai ka përfaqësuar skuadra të tjera të rëndësishme në futbollin kosovar, si Trepça ’89, ku edhe hodhi hapat e parë si profesionist, si dhe Prishtina.