Sunderlandi arrin 40 pikë me fitore 1-0 ndaj Leeds United, Xhaka i kënaqur

Sunderlandi arriti fitoren 1:0 në udhëtim ndaj Leeds United në ndeshjen e xhiros së 29 të Premier League, duke grumbulluar 40 pikë. Kjo shifër ishte synimi kryesor i vendosur në fillim të edicionit dhe besohet se mjafton për të siguruar qëndrimin në kampionatin e elitës angleze.

Kapiteni Granit Xhaka, 33-vjeçar, luajti nga minuta 56 pas një lëndimi që e mbajti jashtë për pesë ndeshje. Pas suksesit të së martës, ai deklaroi për TNT Sport: «Ne kemi folur në fillim të edicionit, synimi ynë ishte 40 pikë. Kemi bërë 40 pikë dhe tani duam më shumë pasi uria është e madhe. Ne duhet të qëndrojmë modest. E dimë prej nga jemi. Kur e arrin synimin e parë dëshiron më shumë. Uria është prezente. I marrim ndeshjet një nga një dhe të shohim ku do të arrijmë».

Sunderlandi përballet me mungesa të rëndësishme, por Xhaka lavdëroi lojtarët zëvendësues. «Për disa lojtarë nuk ishte e lehtë që nuk kanë luajtur. Por na duhen të gjithë. Nuk mund të kesh vetëm 11 lojtarë. Luke O'Nien është shembull i rëndësishëm për këta lojtarë. Ai e meriton gjithë respektin që i bëhet. Është legjendë e këtij klubi. Por të gjithë lojtarët shfaqën karakter dhe kjo na duhet», shtoi ai.

Me 40 pikë, skuadra pozicionohet stabil në mesin e tabelës. BBC vlerësoi se loja u përmirësua ndjeshëm pas hyrjes së Xhakës. «Nuk ishte rastësi që Sunderlandi u përmirësua pas hyrjes së Xhakës. Deri në atë moment nuk ishte skuadra më e mirë në fushë. I kthyer nga një dëmtim së fundi, Xhaka mbeti në stol në fillim të ndeshjes ndaj Leeds United. 33-vjeçari kishte ndikim qetësues, ndërsa skuadra e arriti suksesin e parë në udhëtim që nga tetori. Sunderlandi përballoi edhe 12 minuta të tensionuara të kohës shtesë», shkroi mediumi anglez.