Edicioni i sivjetmë i festivalit ndërkombëtar të muzikës Sunny Hill filloi më 31 korrik në Sunny Hill Festival Park në Bërnicë të Prishtinës. Ngjarja, e cila do të vazhdojë deri më 2 gusht, është kthyer në një nga pikat kryesore të industrisë së muzikës dhe turizmit në Evropën Juglindore. I organizuar nga Dua Lipa, festivali promovon artistët vendorë dhe sjell yje të njohur botërorë përpara publikut.
Nata e parë e festivalit kulmoi me performancën e këngëtares amerikane Katy Perry, e cila u ngjit në skenë rreth orës 22:30. Artistja bëri një dalje spektakolare të frymëzuar nga hapësira, duke u shfaqur me kostum astronauti dhe duke ngritur flamurin e Kosovës, gjest i cili u prit me entuziazëm nga publiku. Para saj, skenën e ndezën edhe artistë të tjerë të njohur, si këngëtarja Dhurata Dora, e cila shprehu nderimin për të ndarë skenën me emra ndërkombëtarë.
Kryeministri në detyrë i Kosovës, Albin Kurti, përmes një njoftimi në rrjetin social “X”, ka përgëzuar organizatorët për punën e bërë. Ai theksoi se ky festival është shndërruar në një nga ngjarjet kulturore më të rëndësishme, duke përmendur se gjatë vitit të kaluar ai tërhoqi mbi 100,000 vizitorë. Përveç rëndësisë kulturore, Sunny Hill shihet si një kontribues i rëndësishëm në zhvillimin e ekonomisë dhe turizmit, duke e vendosur Prishtinën në hartën e destinacioneve moderne muzikore. Programi i festivalit përfshin edhe emra të tjerë të njohur si Martin Garrix dhe Lewis Capaldi.
Përditësime
Katy Perry ndezi atmosferën në Sunny Hill Festival, duke iu drejtuar publikut me pyetjen: 'A jeni shqiptarë, a do të festoni me mua?'. Një nga momentet kulminante të mbrëmjes ishte ngjitja në skenë e 10-vjeçares Era, e cila performoi përkrah artistes. Interesimi i lartë për festivalin krijoi ngarkesë të theksuar trafiku në të gjitha akset rrugore që të çojnë drejt vendit të ngjarjes.
Organizatorët e Sunny Hill Festival kanë konfirmuar pjesëmarrjen e Katy Perry-t, e cila do të sjellë hitet e saj ndërkombëtare, përfshirë 'Firework', 'Roar', 'Dark Horse' dhe 'Teenage Dream'. Programi i këtij edicioni në Prishtinë pasurohet gjithashtu me performancën e grupit gjerman të muzikës elektronike, Keinemusik.
Aktorja e njohur turke, İlsu Demirci, është parë në mesin e publikut në edicionin e sivjetmë të Sunny Hill Festival në Prishtinë, ku po shijon performancat e artistëve ndërkombëtarë, përfshirë atë të Katy Perry.
Pas përfundimit të natës së parë të Sunny Hill Festival, këngëtarja Dua Lipa shprehu vlerësimin e saj për atmosferën e krijuar. Në të njëjtën mbrëmje, organizatorët konfirmuan se krahas Katy Perry, skenën e ndau edhe DJ-i Seth Troxler me një set të veçantë.
Eksperti i zhvillimit kulturor, Ramazan Bekteshi, vlerësoi ndikimin e Sunny Hill Festival në diplomacinë publike të Kosovës. Ai theksoi se pjesëmarrja e yjeve botërore shërben si platformë për përmirësimin e imazhit të vendit, duke e pozicionuar Kosovën përkrah qendrave evropiane të argëtimit dhe duke tërhequr vëmendjen ndërkombëtare ndaj potencialit turistik e kulturor të shtetit.
Sunny Hill Festival përmbyll sonte edicionin e sivjetmë duke shënuar rekord historik të pjesëmarrjes. Shefi i komunikimit, Alban Kastrati, konfirmoi se numri i vizitorëve është më i larti që nga themelimi i festivalit, i cili u hap me performancën e Katy Perry-t. Organizatorët raportuan për një shtrirje globale të audiencës, me vizitorë që kanë udhëtuar nga vende të largëta si Japonia.
Vizitorët theksojnë se festivali po shndërrohet në një katalizator të turizmit kulturor. Pjesëmarrësit nga diaspora dhe vendi shfaqën interes të lartë për artistët vendorë, me theks të veçantë te grupi PINT, ndërsa adhuruesit e muzikës elektronike konfirmuan suksesin e skenës PAËSA si një prej hapësirave më të vizituara. Për më tepër, festivali ka tërhequr një segment të ri vizitorësh, përfshirë ata nga Turqia, të cilët po vizitojnë Kosovën për herë të parë, duke e cilësuar këtë ngjarje si pikën kryesore të interesit të tyre turistik.
Këngëtarja me famë botërore Katy Perry e cilësoi si 'magjike' performancën e saj në Sunny Hill Festival. Ajo falënderoi Dua Lipën për ftesën, ndërsa konfirmoi se koncerti në Prishtinë shënoi mbylljen e turit të saj veror, Eurosummer.
Revista 'Harper’s Bazaar' e vlerësoi Dua Lipën si figurën qendrore të festivalit, duke veçuar ndikimin e saj në modë. Gjatë performancave, këngëtarja spikati me veshje nga shtëpitë e modës Rabanne dhe Chloe. Dua Lipa themeloi 'Sunny Hill Festival' në vitin 2018 bashkë me familjen e saj, duke e shndërruar atë në një platformë të rëndësishme kulturore për Kosovën.
Krahas performancës së Katy Perry në hapjen e Sunny Hill Festival, vëmendjen e tërhoqi edhe Dua Lipa me veshjet nga shtëpitë e modës Rabanne dhe Chloé. Pas koncertit, këngëtarja shprehu emocione për lidhjen e saj me vendlindjen. Ndërkohë, revista Harper’s Bazaar theksoi ndikimin e rikthimit të familjes së saj në Kosovë pas vitit 2008 në formimin e identitetit artistik të saj.