Sylvinho, trajneri i Kombëtares shqiptare, së bashku me ndihmësit Doriva dhe Ervin Bulku, zhvilloi gjatë kësaj jave një vizitë në Turqi për të ndjekur nga afër paraqitjet e lojtarëve kuqezi me klubet e tyre.
Stafi teknik ishte i pranishëm fillimisht në ndeshjen e Kupës së Turqisë mes Istanbul Başakşehir dhe Trabzonspor më 3 mars. Sulmuesi Ernest Muçi luajti si titullar për 90 minuta dhe dha dy asist në fitoren 4-2 të Başakşehir.
Një ditë më pas, ata ndoqën përballjen mes Beşiktaş dhe Çaykur Rizespor. Mesfushori Kristjan Asllani u fut si zëvendësues në minutën e 78-të për Beşiktaş, ndërsa Qazim Laçi qëndroi në stol me Çaykur Rizespor.
Vizita është pjesë e procesit të monitorimit të vazhdueshëm të lojtarëve në prag të ndeshjes së play-off-it të Botërorit 2026 kundër Polonisë, e cila do të luhet më 26 mars në Varshavë dhe transmetohet në Digitalb.
Para udhëtimit në Turqi, Sylvinho kishte vizituar Italinë, ku u takua me kapitenët Berat Gjimshiti dhe Elseid Hysaj. Synimi është mbajtja e kontaktit të drejtpërdrejtë me futbollistët dhe vlerësimi i formës së tyre në klubet përkatëse.