Deputetja e Partisë Demokratike, Jorida Tabaku, vizitoi Babrrun, ku takoi familjen Dervishi. Kjo familje është pronare e një toke të trashëguar ndër breza, e cila, sipas Tabakut, është marrë nga shteti pa kompensim dhe pa të drejtë ligjore. Tokën e ka marrë shteti për t’ia dhënë kompanisë KAYO, me qëllim ndërtimin e një fabrike prodhimi armësh.
Në një video të publikuar në rrjetet sociale, Tabaku e përshkroi rastin si ilustrim të një fenomeni më të gjerë, ku prona private nuk respektohet dhe ligji zbatohet në mënyrë selektive. Ajo u shpreh: “Jemi në pronën e familjes Dervishi, një tokë e trashëguar në vite, e ruajtur dhe e investuar me aq mundësi sa kanë pasur. Sot shteti vjen, pa asnjë kompensim dhe pa asnjë të drejtë ligjore, dhe e uzurpon për t’ia dhënë KAYO-s për ndërtimin e një fabrike armësh”.
Tabaku ngriti pyetje për standardet europiane, duke thënë se shteti është i fortë me të dobëtin dhe i dobët me të fortin. Ajo theksoi rëndësinë e së drejtës së pronës si themel i shtetit ligjor dhe i integrimit europian. “Prona është e shenjtë. Nëse nuk respektohet e drejta e pronës, atëherë nuk mund të flasim për asnjë të drejtë tjetër. Kjo nuk është Shqipëria europiane që duam”, deklaroi ajo.
Deputetja demokrate premtoi se do ta ndjekë çështjen e familjes Dervishi deri në fund, duke ofruar mbështetje në çdo hap ligjor e institucional. Ajo e cilësoi betejën si çështje që shkon përtej rastit individual dhe prek thelbin e shtetit të së drejtës në vend.