Gjatë mbledhjes së Komisionit të Posaçëm për Reformën Territoriale, deputetja Jorida Tabaku shprehu pakënaqësi për mungesën e drejtueses së komanduar të Bashkisë së Tiranës, si dhe për mungesën e kryetarëve të bashkive Kamëz dhe Kavajë. Tabaku e cilësoi këtë veprim si mungesë të llogaridhënies ndaj institucioneve dhe qytetarëve, duke kujtuar se Bashkia e Tiranës administron rreth një të tretën e popullsisë së vendit.
Sipas deputetes demokrate, reforma territoriale e vitit 2015 ka thelluar pabarazitë midis qendrës dhe zonave periferike. Ajo deklaroi se rreth 70% e investimeve publike janë përqendruar në zonat urbane qendrore, ndërsa ish-komunat vijojnë të përballen me mungesë të shërbimeve bazë. Një tjetër shqetësim i ngritur lidhej me rritjen e numrit të punonjësve në bashki, nga 5 mijë në vitin 2015 në rreth 9 mijë aktualisht, proces i cili sipas saj nuk është reflektuar në rritjen e cilësisë së shërbimeve.
Tabaku kritikoi gjithashtu administrimin e përkohshëm të kryeqytetit përmes komandimit, duke e konsideruar si një pengesë për qeverisjen efikase. Ndër çështjet e tjera të përmendura gjatë fjalës së saj në komision ishin problematikat në planifikimin urban, administrimi financiar dhe situata lidhur me inceneratorin.