Deputetja e Partisë Demokratike, Jorida Tabaku, reagoi për rritjen e çmimeve në Shqipëri, duke e lidhur atë me modelin ekonomik dhe vendimmarrjen qeveritare. Reagimi erdhi pas vendimit të Bordit të Transparencës për të rritur çmimin e naftës, edhe pse akciza mbi këtë produkt u ul.
Sipas saj, familjet shqiptare përballen çdo muaj me shpenzime në rritje, ndërsa të ardhurat mbeten të ulëta. Raporti mes çmimeve dhe të ardhurave është i pabarabartë: çmimet në Shqipëri arrijnë rreth 60% të nivelit të Bashkimit Europian, ndërsa të ardhurat vetëm 20% të tij.
Tabaku argumenton se kjo situatë nuk vjen nga tregu i lirë, por nga deformimi i tij. Në sektorë si produktet e shportës dhe karburantet, mungesa e konkurrencës ka krijuar struktura oligopoliste, ku çmimet përcaktohen nga aktorë ekonomikë të fuqishëm.
Një faktor tjetër është barra fiskale e lartë dhe e komplikuara, e cila transferohet te konsumatori. Nga karburanti te ushqimet bazë, taksat kanë rritur kostot e jetesës.
Në thelb të problemit, ajo identifikon modelin ekonomik aktual si të shteruar dhe të varur nga shpenzimet publike, pa mbështetje për prodhimin dhe investimin privat. “Çmimet e larta nuk janë rastësi. Ato janë rezultat i një sistemi që nuk funksionon për shumicën”, thekson Tabaku.