Jorida Tabaku, deputete e Partisë Demokratike, deklaroi se qeveria ka braktisur fermerët shqiptarë, duke e lidhur rritjen e çmimeve të produkteve esenciale me mungesën e politikave mbështetëse për bujqësinë. Në një video-postim në Facebook më 3 mars 2026, ajo theksoi se frutat, perimet dhe produktet e fshatit janë kthyer në luks për qytetarët, veçanërisht për pensionistët dhe shtresat në nevojë.
“Rritja e çmimeve në mënyrë të pakontrolluar i ka kthyer ato në produkte të ndaluara për shumë familje shqiptare”, u shpreh ajo.
Tabaku argumentoi se bujqësia, e cila përbën rreth 16% të Prodhimit të Brendshëm Bruto, po përballet me taksa të larta, zhvlerësim të euros dhe mungesë mbështetjeje nga shteti. “Produktet shqiptare nuk prodhohen më si më parë, ndërsa fermerët janë lënë të mbijetojnë pa ndihmë reale”, deklaroi ajo.
Ajo solli të dhëna për rritjen e importeve: në 2021 importoheshin 30 mijë tonë zarzavate, ndërsa sot kanë arritur 70 mijë tonë. Importi i frutave ka kaluar nga 60 mijë tonë në 100 mijë tonë. Kjo situatë tregon zëvendësimin e prodhimit vendas me atë të importuar, duke rritur varësinë nga jashtë dhe presionin mbi çmimet.
“Produktet që sot shkojnë në tryezat e qytetarëve vijnë nga jashtë, sepse Shqipëria nuk po prodhon më”, akuzoi ajo qeverinë për politika fiskale dhe ekonomike të gabuara. Tabaku theksoi se bujqësia ka nevojë për mbështetje minimale për të prodhuar më shumë dhe për të garantuar çmime të përballueshme. “Toka shqiptare prodhon. Fshati shqiptar prodhon”, shtoi ajo.