Deputeti i Partisë Demokratike, Eno Bozdo, ka reaguar ashpër ndaj deklaratave të kryeministrit Edi Rama, i cili ua ka atribuar pronarëve të supermarketeve përgjegjësinë për shtrenjtimin e produkteve ushqimore. Përmes një postimi në rrjetet sociale, Bozdo akuzoi kreun e qeverisë se po përdor supermarketet si "grupi armiqësor i radhës" për të shmangur përgjegjësinë e tij në administrimin e ekonomisë dhe shkatërrimin e bujqësisë.
Sipas deputetit demokrat, zhvlerësimi i euros, i cili teorikisht duhej të sillte ulje të çmimeve, nuk ka prodhuar efekte për shkak të mungesës së një tregu konkurrues. Bozdo nënvizoi se në Shqipëri mbizotërojnë oligopolet, të cilat sipas tij, kanë krijuar një varësi të madhe nga importet. Ai theksoi se 90% e produkteve ushqimore që konsumohen në vend vijnë nga jashtë, ndërsa linjat e furnizimit kontrollohen nga klientë të pushtetit.
Bozdo shtoi se çmimet e shportës ushqimore në vend janë 5% më të larta se mesatarja në Evropë, duke argumentuar se shkaku kryesor është dëmtimi i bujqësisë dhe blegtorisë vendase gjatë viteve të fundit. Ai i kërkoi kryeministrit që të përballet me këto probleme strukturore, në vend që t'i adresojë ato te subjektet tregtare, duke përdorur metaforën se nëse "s'ke ç't'i bësh samarit, i bie gomarit".