Enno Bozdo, deputet i Partisë Demokratike, mbajti një fjalim në foltoren e organizuar nga partia para Kryeministrisë në Tiranë këtë të hënë, pas protestës të së dielës.
Ai akuzoi qeverinë për mungesë reagimi ndaj rritjes së çmimeve, veçanërisht në javët e fundit, që po ndjehet nga të gjithë qytetarët. Bozdo deklaroi se vendet e tjera të Europës dhe rajonit po miratojnë paketa ndihme për ekonominë dhe familjet, ndërsa në Tiranë nuk ndërmerret asnjë veprim.
"Sot e vuajmë të gjithë rritjen e çmimeve. Çdo ditë dëgjojmë se si qeveritë europiane miratojnë paketa ndihme për qytetarët e tyre. Ndërsa në Tiranë nuk ndodh asgjë, vetëm një tallje e madhe", u shpreh ai.
Bozdo kritikoi kryeministrin Edi Rama për mungesë vendimmarrjeje dhe masa konkrete. Sipas tij, qeveria nuk ka zhvilluar asnjë mbledhje për situatën dhe nuk ka ndërhyrë për të lehtësuar barrën ekonomike të qytetarëve. Ai theksoi se qytetarët shqiptarë janë ndër më të papërfillurit në Europë për shkak të mungesës së politikave mbështetëse.
Duke u ndalur te çmimet e ushqimeve bazë, Bozdo vuri në dukje rritjen e tyre ditore. Sa i përket karburanteve, ai u shpreh se Shqipëria ka një nga ngarkesat fiskale më të larta në Europë për naftën, ku rreth 60% e çmimit përbëhet nga taksat që i kthehen qeverisë.