Deputetja e Partisë Demokratike, Jorida Tabaku, në një intervistë për A2CNN me gazetaren Fjorela Beleshi në emisionin "Ditari i Pasdites", të drejtuar nga Pandi Gjata, tha se ndryshimi i gjysmës së qeverisë nga kryeministri Edi Rama, 5 muaj pas nisjes së mandatit, ka ardhur nga presioni i opozitës përmes protestave, ndërgjegjësimi ndërkombëtar dhe detyrimet e procesit të integrimit evropian.
Ajo theksoi se emrat e ministrave shkojnë e vijnë, ndërsa sistemi mbahet në këmbë nga Edi Rama, kundër të cilit drejtohet opozita. "Një qeveri që ndryshohet 5 muaj pas nisjes së mandatit të saj, të gjithë e kuptojnë që ka presion nga qytetarët dhe opozita, si dhe ndërgjegjësim ndërkombëtar nga protestat", deklaroi Tabaku.
Sa i përket mesazheve ndërkombëtare, ajo përmendi McAllister-in, i cili ka thënë se hapësirat e opozitës në Parlament janë të ngushtuara dhe se reforma në drejtësi duhet zbatuar pa hezitim. Për herë të parë, sipas saj, Shqipëria përmendet për çështje sigurie, me fokus te qeveria dhe jo te opozita.
Në lidhje me editorialin e Ramës dhe Vuçiç-it, si dhe qëndrimin ndaj Bashkimit Evropian, Tabaku vuri në dukje se pas 12 vitesh premtime për integrim, qeveria ngre duart dhe thotë se s’e arrin dot. "Thotë se jemi të gatshëm të jemi aneks i përhershëm, që qytetarët shqiptarë të jenë të dorës së dytë", shtoi ajo.