Gjatë një seance të gjatë parlamentare, kryeministri Edi Rama dhe deputetja Jorida Tabaku shkëmbyen replika të forta lidhur me protestat qytetare që po zhvillohen prej 110 ditësh. Jorida Tabaku sfidoi kreun e qeverisë të përballet me protestuesit që ndodhen para institucionit, duke theksuar se kërkesa kryesore e tyre është dorëheqja e tij.
"Kur t’i kesh 110 ditë poshtë derës protestuesit e të thuash 'na përzënë ne', provo njëherë të dalësh atje", deklaroi Tabaku, duke i kërkuar Ramës që t'i trajtojë kërkesat e qytetarëve si një këmbanë alarmi dhe jo me arrogancë. Ajo shtoi se është e domosdoshme që kryeministri të reflektojë ndaj thirrjeve për largim.
Nga ana tjetër, Edi Rama hodhi poshtë kritikat, duke argumentuar se protestat para qeverisë janë tregues i demokracisë dhe krenarisë, veçanërisht kur ato zhvillohen në bulevardin ku janë vrarë dhe plagosur më parë qytetarë. Rama ironizoi qëndrimin e opozitës, duke e lidhur atë me një shprehje popullore për situatën e tyre në raport me protestuesit.
"Kur qytetarët që protestojnë i thonë opozitës dhe juve personalisht 'largohu', atëherë është një sëmundje ngjitëse që ajo protestë nuk e do. Dhe nuk kanë faj, sepse ju jeni një sëmundje ngjitëse e humbjes kronike. Kush ju afrohet, humb", u shpreh kryeministri, duke shtuar se të jesh në opozitë dhe të të përzënë nga protesta quhet "amanet mushkat, se kuajt ikën".