Deputetja e Partisë Demokratike, Jorida Tabaku, ka replikuar me raportuesin për Shqipërinë në Parlamentin Europian, Andreas Schieder, lidhur me vlerësimin e protestës së opozitës të 24 janarit dhe situatën e demokracisë në vend.
Në një intervistë për emisionin “ÇdoKënd” me Merita Haklaj, Tabaku deklaroi se protesta është një mjet europian për shprehjen e pakënaqësisë. “Nuk është mënyrë europiane të mbrosh korrupsionin. Protesta është mënyrë europiane për të thënë gjërat”, u shpreh ajo.
Tabaku nënvizoi se shqetësimi për çështjen e zëvendëskryeministres Belinda Balluku shkon përtej interesave të Partisë Demokratike. Sipas saj, zvarritja e shqyrtimit të kërkesës së SPAK-ut për heqjen e imunitetit të saj përbën një precedent të rrezikshëm dhe një mburojë politike ndaj drejtësisë.
“Ky nuk është shqetësim vetëm i PD-së, por i gjithë shoqërisë dhe një pengesë serioze për integrimin europian. Imuniteti nuk është privilegj, por përgjegjësi”, theksoi Tabaku. Ajo akuzoi mazhorancën se po zvarrit procesin me qëllim, duke cenuar kredibilitetin e SPAK-ut dhe duke dërguar mesazhin se korrupsioni mund të mbrohet përmes forcës politike.
Tabaku sqaroi se problemi real nuk janë molotovët e përmendur në protestë, por mbrojtja politike e korrupsionit.