Jorida Tabaku, kryetare e Komisionit për të Drejtat e Njeriut dhe Mjetet e Informimit Publik në Kuvend, zhvilloi një takim me Günther Krichbaum, përfaqësuesin gjerman për çështjet europiane, gjatë vizitës së tij në Shqipëri.
Tabaku e njohu Krichbaum me zhvillimet politike të fundit, duke u ndalur te procesi i integrimit europian dhe sfidat që e pengojnë atë.
Sundimi i ligjit dhe drejtësia
Në qendër të bisedës ishin sundimi i ligjit, funksionimi i drejtësisë dhe hetimet e SPAK, veçanërisht dosjet që prekin nivele të larta të qeverisjes dhe institucionet publike. Tabaku theksoi presionin në rritje të qeverisë ndaj sistemit të drejtësisë, si dhe problematikat me amendamentet e Kodit Penal të ri, aktualisht në shqyrtim në Kuvend.
Ajo nënvizoi nismën e saj për dekriminalizimin e shpifjes, në përputhje me rekomandimet e Progres-Raportit të Bashkimit Europian, si hap të domosdoshëm për mbrojtjen e lirisë së medias dhe të fjalës.
Investimet e huaja
Takimi trajtoi situatën e investimeve të huaja dhe mekanizmin e shqyrtimit të tyre. Sipas Tabakut, qeveria nuk ka treguar vullnet politik për të zbatuar rregulloren e BE-së për kontrollin e investimeve nga vende të treta jomiqësore, duke krijuar rreziqe për sigurinë, transparencën dhe konkurrencën e ndershme.
Procesi zgjedhor dhe integrimi
Një temë tjetër ishte procesi zgjedhor dhe mosplotësimi i kritereve për demokracinë dhe shtetin e së drejtës, pjesë e grup-kapitullit të parë të negociatave. Tabaku vlerësoi se qeveria mbetet "vite dritë" larg integrimit real, ndërsa periudhat e ndërmjetme tregojnë se integrimi përdoret si fasadë dhe retorikë politike, jo si reforma të thella.
Në përfundim, Tabaku siguroi se Partia Demokratike dhe opozita janë të angazhuara plotësisht në integrimin europian, duke e konsideruar atë jetik për të ardhmen e vendit dhe ndërtimin e institucioneve funksionale.