Në vendkalimin kufitar të Tabanocit, në kufirin ndërmjet Maqedonisë së Veriut dhe Serbisë, janë vendosur tabela të reja shtetërore të cilat nuk përmbajnë mbishkrime në gjuhën shqipe. Tabelat e instaluara nga Ndërmarrja Publike për Rrugët Shtetërore përdorin vetëm gjuhën maqedonase, atë angleze dhe frëngjisht. Ky rast është raportuar si një përsëritje e praktikave të mëparshme, ku gjuha shqipe, ndonëse zyrtare, është lënë jashtë mbishkrimeve rrugore në disa lokacione të tjera.
Nënkryetari i Bashkimit Demokratik për Integrim (BDI), Bujar Osmani, ka reaguar lidhur me këtë zhvillim, duke e vlerësuar situatën si shqetësuese për përfaqësimin e shqiptarëve në shtet. Në deklaratën e tij, Osmani theksoi se gjuha shqipe nuk është pronë e një partie, por element i përfaqësimit të shqiptarëve në shtet. Ai u bëri thirrje qytetarëve shqiptarë që kanë mbështetur koalicionin VLEN, si dhe miqve maqedonas, që të mos heshtin përballë këtij veprimi.
Në anën tjetër, zëvendësdrejtori i Doganave, Mustafa Dauti, publikoi pamje të një tabele tjetër në të njëjtin lokacion që përmban gjuhën shqipe. Megjithatë, burimet sqarojnë se ajo tabelë është vendosur vite më parë, gjatë ndryshimit të emrit të shtetit, ndërsa tabela e re e vendosur së fundmi nuk e përfshin gjuhën shqipe. Portalb.mk raportoi se ka kërkuar sqarime nga Ndërmarrja Publike për Rrugët Shtetërore mbi këtë çështje, por deri në këto momente nuk ka marrë ende një përgjigje zyrtare.
Përditësime
Nënkryetari i BDI-së, Bujar Osmani, e cilësoi përjashtimin e gjuhës shqipe nga sinjalistika e re në pikën kufitare Tabanoc si shkelje ligjore. Osmani e konsideroi këtë veprim si shpërfillje të legjitimitetit institucional, duke theksuar se përfaqësimi i gjuhës shqipe duhet të jetë në përputhje me rezultatet e regjistrimit të popullsisë, sipas të cilit shqiptarët përbëjnë 29.5% të popullsisë.
Autoritetet kanë vendosur një tabelë të re sinjalizuese në pikën kufitare të Tabanocit, e cila përmban informacion vetëm në gjuhën maqedonase dhe angleze. Tabela njofton drejtuesit e automjeteve të rënda për regjimin e qarkullimit gjatë sezonit veror. Ekspertët juridikë vlerësojnë se kjo shkelje bie ndesh me nenet 16 dhe 23 të Ligjit për Përdorimin e Gjuhëve, të cilat detyrojnë institucionet që në vendkalimet kufitare të përdorin edhe gjuhën shqipe.
Koalicioni VLEN publikoi vendime të Gazetës Zyrtare të vitit 2020, të cilat parashikojnë përdorimin e gjuhës maqedonase, angleze dhe frënge në vendkalimet kufitare. Përfaqësuesit e VLEN-it argumentuan se tabela e re, e cila tashmë përfshin edhe gjuhën frënge si gjuhë të tretë, është në përputhje me praktikat e trashëguara. Njëkohësisht, ata akuzuan BDI-në se e ka lënë këtë çështje të pazgjidhur dhe të pasqaruar ligjërisht gjatë periudhës kur kjo parti ushtronte pushtetin.