Besnik Tahiri, shef i Grupit Parlamentar të Aleancës për Ardhmërinë e Kosovës (AAK), i është drejtuar me letër zyrtare kryetares së Kuvendit të Kosovës, Albulena Haxhiu, duke kërkuar shpjegime të detajuara për financimin e ekspozitës së Shkëlzen Gashit nga Kuvendi.
Ekspozita, e financuar nga Kuvendi, përmban të dhëna të pasakta në lidhje me masakrat e shkaktuara në Kosovë nga forcat serbe gjatë viteve 1998-1999 dhe ka nxitur reagime të shumta.
Në letër, Tahiri ngrit shqetësime për përdorimin e fondeve publike dhe kërkon sqarime specifike:
- Shuma e saktë e mjeteve financiare të ndara për realizimin e ekspozitës.
- Data e hapjes së thirrjes për aplikim dhe kriteret e përzgjedhjes së përfituesve.
- Numrin e organizatave që kanë konkurruar për projektin.
- Identifikimin e institucioneve ose trupave vendimmarrëse për përzgjedhjen përfundimtare.
Tahiri thekson nevojën për transparencë të plotë dhe llogaridhënie, veçanërisht në tema të ndjeshme që prekin historinë dhe kujtesën kolektive, për të ruajtur besimin e qytetarëve në institucione.