Tajvani po përgatitet për afrimin e tajfunit Champi, i cili po dobësohet, por mund të godasë drejtpërdrejt ishullin. Sipas Administratës Qendrore të Motit të Tajvanit (CWA), stuhia regjistronte erëra me shpejtësi rreth 191 kilometra në orë pranë qendrës. Në kulmin e saj, Champi u klasifikua si supertajfun dhe si një nga stuhitë më të fuqishme në Paqësor këtë vit.
Në kohën e raportimit, stuhia ndodhej rreth 320 kilometra në lindje të skajit jugor të Tajvanit. Sipas parashikimeve, ajo pritet të kalojë pranë pjesës verilindore të ishullit, të kthehet drejt veriut, në drejtim të bregdetit kinez, dhe më pas të zhvendoset drejt Japonisë jugore. Meteorologu i CWA-së, Liu Pei-teng, tha për agjencinë Reuters se nuk mund të përjashtohet dalja e tajfunit në tokë, nëse ndryshon trajektorja ose ngadalësohet. Ai paralajmëroi se përmasat e mëdha të sistemit mund të zgjasin periudhën e erërave të forta në Tajvan.
Bilanci paraprak është një person i vdekur dhe 94 të plagosur. Qeveria njoftoi se rreth 1,300 persona janë evakuuar nga zonat malore për shkak të reshjeve të dendura dhe rrezikut nga rrëshqitjet e dheut. Autoritetet në qytetet bregdetare kanë dërguar paralajmërime në telefonat e banorëve për erëra që mund të kalojnë 150 kilometra në orë, duke u kërkuar të strehohen. Në zonat malore veriore, përfshirë rajonin përreth kryeqytetit Taipei, parashikohen reshje deri në afro një metër.
Puna dhe mësimi janë pezulluar të premten në pothuajse të gjitha 22 qarqet dhe qytetet e Tajvanit. Përjashtim është qarku Kinmen, ku aktivitetet do të vijojnë normalisht. Bursa e aksioneve e Tajvanit është mbyllur për ditën. Në disa zona të Taipeit janë regjistruar mbi 200 milimetra shi brenda 24 orëve. Autoritetet u kanë bërë thirrje qytetarëve të shmangin plazhet, vijën bregdetare dhe zonat malore për shkak të erërave të forta, përmbytjeve dhe rrëshqitjeve të mundshme të dheut.
Tajfuni ka ndërprerë edhe transportin ajror. Sipas RTSH-së dhe Java News, më shumë se 160 fluturime janë anuluar nga katër linja ajrore japoneze. All Nippon Airways (ANA) anuloi fluturimet që niseshin ose mbërrinin në aeroportet Miyako dhe Ishigaki, në prefekturën Okinawa. Probleme u raportuan edhe në aeroportet Okhotsk Monbetsu, Okinawa Naha, Tsushima, Miyazaki dhe Kagoshima. Japan Airlines anuloi fluturime drejt aeroportit Songshan të Taipeit dhe Aeroportit Ndërkombëtar Taoyuan të Tajvanit.