Tajfuni Dujuan, i 25-ti që godet Japoninë këtë vit, ka sjellë erëra të forta, reshje intensive dhe rrëshqitje dheu. Sipas Ministrisë së Punëve të Brendshme të Japonisë, urdhri për evakuim, i cili nuk është i detyrueshëm, prek 1,908,645 persona në prefekturat Ibaraki, Chiba, Tokio, Kanagawa, Shizuoka dhe Saitama. Përveç tyre, rreth 300 mijë persona të tjerë janë nxitur të largohen nga zonat e konsideruara të rrezikuara.
Stuhia ka shkaktuar pasoja të ndjeshme në infrastrukturë dhe shërbime. Mbi 50 mijë persona kanë mbetur pa energji elektrike, ndërsa janë anuluar rreth 300 fluturime dhe janë pezulluar disa linja hekurudhore. Aktivitete të rëndësishme, si festivali “Rock in Japan” dhe “Tokyo Game Show”, kanë anuluar programin e së hënës. Në Tokio, shërbimet e emergjencës kanë këshilluar banorët të shmangin bodrumet dhe të tregojnë kujdes nga kapakët e pusetave për shkak të rrezikut të përmbytjeve të menjëhershme.
Në terren janë raportuar disa incidente. Në qytetin Yokosuka, autoritetet po kërkojnë një grua rreth të 60-ave, e cila dyshohet se është marrë nga një rrëshqitje dheu që ka shkatërruar banesën e saj. Ndërsa në prefekturën Chiba, një burrë rreth të 50-ave është shpëtuar dhe dërguar në spital pasi mbeti i bllokuar gjatë punës për pastrimin e mbetjeve në një zonë të prekur nga rrëshqitjet.
Agjencia Meteorologjike e Japonisë ka raportuar erëra me shpejtësi deri në 130 km/h, me shpërthime që arrijnë deri në 194 km/h. Ekspertët e lidhin fuqinë e stuhive me ndryshimet klimatike dhe fenomenin natyror “El Niño”, i cili favorizon ngrohjen e ujërave të oqeanit dhe intensifikimin e tajfuneve.
Përditësime
Kryeministrja japoneze Sanae Takaichi anuloi vizitën e saj zyrtare në Shtetet e Bashkuara për të menaxhuar krizën e shkaktuar nga tajfuni Dujuan. Agjencia Meteorologjike e Japonisë ngriti alarmin e Nivelit 5, shkalla më e lartë e rrezikut, për qytetin Oshima dhe ishujt Izu, ku janë prekur 1,900 familje me mbi 3,000 banorë. Në Tokio, autoritetet aktivizuan alarmin e Nivelit 4 në lagjen Meguro, ndërsa pjesa qendrore e kryeqytetit mbetet në Nivelin 3. Kriza e transportit ajror u përkeqësua, me 500 fluturime të anuluara në aeroportet Haneda dhe Narita, duke tejkaluar shifrën prej 300 fluturimesh të raportuar më herët.
Autoritetet japoneze kanë urdhëruar evakuimin e rreth 2 milionë banorëve në disa prefektura për shkak të rrezikut të lartë nga stuhia. Agjencia Meteorologjike e Japonisë ka lëshuar paralajmërime të nivelit 4 për rrëshqitje dheu në zonat Shinagawa, Toshima dhe Niijima. Mbi 50 mijë familje kanë mbetur pa energji elektrike, ndërsa shërbimet hekurudhore janë pezulluar në disa zona të prekura. Dujuan është tajfuni i 25-të që godet Japoninë këtë vit.