Sanae Takaichi, kryeministrja e Japonisë, pritet të shprehë gatishmërinë e qeverisë së saj për t’u bashkuar në sistemin amerikan të mbrojtjes 'Kupola e Artë' ose 'Golden Dome', gjatë takimit me presidentin amerikan Donald Trump më 19 mars në Uashington. Kjo sipas gazetës japoneze Yomiuri Shimbun.
Sistemi synon mbrojtjen e territorit nga sulmet ajrore të mundshme, me një pjesë të interceptorëve të vendosur në hapësirë për të përballuar kërcënimet e reja. Plani parashikon bashkëpunim mes Shteteve të Bashkuara dhe Japonisë në zhvillimin e armëve interceptuese dhe një rrjeti satelitësh për të neutralizuar automjetet hipersonike rrëshqitëse (Hypersonic Glide Vehicle).
Këto armë, të zhvilluara nga Kina dhe Rusia, arrijnë shpejtësi mbi Mach 5 (rreth 5.960 km/orë), duke i bërë të vështira për t’u interceptuar nga sistemet tradicionale. Pjesëmarrja në këtë iniciativë do të forcojë aftësitë mbrojtëse të Japonisë në një rajon me siguri të ndërlikuar.
Në vitet e fundit, Tokio ka nisur të braktisë disa politika tradicionale pacifiste pas Luftës së Dytë Botërore, duke zhvilluar aftësi kundërsulmi dhe duke rritur shpenzimet ushtarake. Në dhjetor, qeveria e Takaichi miratoi buxhet rekord për mbrojtjen prej rreth 9 trilionë jen (rreth 49 miliardë euro) për vitin fiskal që nis më 1 prill.