Në Kroaci u mbajt takimi trepalësh në nivelin e drejtorëve të Politikave të Mbrojtjes dhe Armatimeve midis Kosovës, Shqipërisë dhe Kroacisë. Ky aktivitet u zhvillua në bazë të Deklaratës së përbashkët trepalëshe, të nënshkruar në vitin 2025 nga ministrat e mbrojtjes të tre vendeve.
Delegacioni i Kosovës u udhëhoq nga Drejtori i Politikave të Mbrojtjes, Faruk Geci. Gjatë takimit u shkëmbyen mendime për avancimin e bashkëpunimit në fushën e aftësive mbrojtëse, bashkëpunimin ndërmjet industrive mbrojtëse të vendeve nënshkruese, si dhe hapat e mëtejshëm për zbatimin e Deklaratës.
Deklarata përcakton katër fusha kryesore të bashkëpunimit trepalësh:
- Promovimin e bashkëpunimit në fushën e aftësive mbrojtëse dhe industrisë mbrojtëse;
- Rritjen e ndërveprueshmërisë përmes arsimit, trajnimit dhe ushtrimeve të përbashkëta;
- Adresimin e kërcënimeve hibride dhe forcimin e qëndrueshmërisë;
- Ofrimin e mbështetjes së vazhdueshme për integrimin euroatlantik.
Sipas Ministrisë së Mbrojtjes së Kosovës, deklarata konfirmon angazhimin për forcimin e bashkëpunimit në fushën e sigurisë dhe mbrojtjes, me synim rritjen e sigurisë dhe stabilitetit në Evropën Juglindore. U theksua rëndësia e përpjekjeve të koordinuara për adresimin e sfidave të reja të sigurisë, kërcënimeve hibride dhe rreziqeve të tjera që mund të cenojnë stabilitetin rajonal dhe ndërkombëtar.
Përditësime
Liderët e Kosovës, Shqipërisë dhe Kroacisë nënshkruan një deklaratë më 18 mars 2025 në Tiranë, në takimin e parë trepalësh të këtij lloji.
- Presidenti serb Aleksandar Vuçiq e cilësoi si "aleancë ushtarake dhe sulmuese kundër serbëve dhe Serbisë".
- Nënshkruesit thonë se deklarata nuk synon askënd, përfshirë Serbinë.
Ministri i Mbrojtjes i Shqipërisë, Pirro Vengu, u përgjigj kritikave se ka ftuar Serbinë të bashkohet në paktin e mbrojtjes, por Beogradi nuk i është përgjigjur ftesës.