Në kuadër të aktiviteteve për 35-vjetorin e krijimit të Partisë Socialiste, drejtuesi politik për qarkun Tiranë, Taulant Balla, zhvilloi një takim në qytetin e Rrogozhinës. Gjatë fjalës së tij, ai rikujtoi rrugëtimin e kësaj force politike që prej 12 qershorit 1991.
Taulant Balla vlerësoi mbështetjen e vazhdueshme të banorëve të Rrogozhinës ndër vite. Ai e cilësoi këtë përvjetor si një moment historik, duke u ndalur veçanërisht te procesi i integrimit të vendit në Bashkimin Europian. Sipas Ballës, dy vitet e ardhshme do të jenë vendimtare për përmbylljen e këtij objektivi strategjik.
Në aspektin e ecurisë politike, Balla theksoi se Partia Socialiste ka shënuar suksese të konsiderueshme, duke fituar 15 nga 20 procese elektorale në nivel kombëtar që nga themelimi. Ai veçoi kontributin e qeverisjes së Edi Ramës, nën drejtimin e të cilit, partia ka fituar 9 nga 10 garat elektorale. Në përfundim, ai u shprehu mirënjohje anëtarëve të thjeshtë, duke theksuar se merita kryesore u përket atyre.