Taulant Balla, kryetar i Grupit Parlamentar të Partisë Socialiste, ka përkujtuar sot 34-vjetorin e krijimit të Forumit Rinor Eurosocialist të Shqipërisë (FRESSH).
Sipas postimit të tij, FRESSH u krijua si sot 34 vite më parë nga studentë pjesëmarrës në lëvizjen studentore të dhjetorit 1990, të cilët përqafuan vlerat e socialdemokracisë europiane pas vendosjes së pluralizmit politik në Shqipëri. Balla e cilëson FRESSH-në si organizatën më të madhe politike rinore në vend dhe një shkollë të vërtetë politike për breza të rinjsh.
Ai rikujton misionin e FRESSH-së për aktivizmin politik të të rinjve, i mbështetur nga organizatat partnere të partive socialiste dhe socialdemokrate europiane. Në një kohë të shkurtër, FRESSH u anëtarësua në IUSY dhe ECOSY, duke i paraprirë anëtarësimit të Partisë Socialiste në IS dhe PES.
Balla nënvizon se orientimi europian i FRESSH-së, si organizatë rinore përkrah Partisë Socialiste, ka mbetur i pandryshueshëm që nga dita e parë. Ky orientim buron nga misioni i studentëve të dhjetorit: “e duam Shqipërinë si gjithë Europa”, pra integrimi europian i Shqipërisë.
Në postimin e tij, Balla shpjegon simbolikën e parë të FRESSH-së: një lulëkuqe kuq e zi mes 12 yjeve të Bashkimit Europian. Ai shton se në çdo aktivitet të FRESSH-së, pas himnit kombëtar, dëgjohej kënga “Go West” e Pet Shop Boys: “Shko në Perëndim, ka Diell në Kohë Dimri”. Kjo frymë, sipas tij, përbën “ADN-në” politike të Partisë Socialiste, e cila po çon vendin drejt Bashkimit Europian.