Taulant Balla, kryetari i Grupit Parlamentar të Partisë Socialiste dhe drejtues politik i saj për Diasporën, priti sot në Kuvendin e Shqipërisë Enkelejda Dajçin (Beqon), përfaqësuese të diasporës shqiptare në Landin e Bavarisë, Gjermani.
Gjatë takimit, Balla vlerësoi rolin e diasporës shqiptare në Bavari dhe theksoi rëndësinë e lehtësimit të procedurave për lejet e qëndrimit dhe punësimit. Ai i cilësoi këto masa si faktorë kyç për integrimin dhe suksesin e shqiptarëve në Gjermani.
“Në Bavari jetojnë e punojnë rreth 18 mijë shtetas shqiptarë dhe vlerësojmë lehtësimin e procedurave për lejet e qëndrimit, punësimit. Gjithashtu në universitetet e Bavarisë studiojnë afro 800 studentë shqiptarë”, deklaroi Balla.
Takimi u vlerësua si dëshmi e vëmendjes që institucionet shqiptare i kushtojnë diasporës dhe forcimit të lidhjeve me komunitetet shqiptare jashtë vendit.