Taulant Balla, kryetar i Grupit Parlamentar të Partisë Socialiste, zhvilloi të mërkurën, më 15 prill 2026, në Kuvend një takim me përfaqësues të diasporës shqiptare në rajonin Emilia Romagna të Italisë, Astrit Poti, Eva Baçi dhe Dorina Merdini.
Gjatë takimit, Balla shprehu mirënjohjen për angazhimin dhe kontributin e tyre të vazhdueshëm në mbështetje të komunitetit shqiptar në këtë rajon. Ai vlerësoi rolin e diasporës në ruajtjen e identitetit kombëtar dhe forcimin e lidhjeve me atdheun.
Një vëmendje e veçantë u kushtua nismave në fushën e arsimit, me fokus ruajtjen dhe promovimin e gjuhës shqipe tek brezat e rinj. Sipas njoftimit, në fillim të muajit qershor pritet një vizitë në Emilia Romagna, ku do të promovohet një tjetër shkollë shqipe në qytetin e Bolonjës.
Ky zhvillim konsiderohet hap i rëndësishëm drejt fuqizimit të identitetit kulturor dhe gjuhësor të diasporës shqiptare, si dhe dëshmi e bashkëpunimit ndërmjet institucioneve shqiptare dhe komuniteteve jashtë vendit.