Taulant Balla, kryetar i Grupit Parlamentar të Partisë Socialiste dhe drejtues politik për Diasporën, priti në Kuvendin e Shqipërisë Besmir Rrjollin, anëtar të Këshillit Koordinues të Diasporës dhe zë aktiv i komunitetit shqiptar në Milano.
Gjatë takimit, i zhvilluar më 24 janar 2026, u diskutua mbi përgatitjet për Samitin e Diasporës, që do të mbahet më 14-15 prill, si dhe mbi nevojën për forcimin e marrëdhënieve me shqiptarët që jetojnë jashtë vendit.
Në fokus të bisedës ishin çështjet që lidhen me ruajtjen dhe mësimin e gjuhës shqipe në diasporë, promovimin e kulturës kombëtare dhe rritjen e përfshirjes së diasporës në zhvillimin e Shqipërisë.
Takimi u zhvillua në kuadër të angazhimit institucional për të thelluar dialogun me diasporën dhe për të forcuar bashkëpunimin me komunitetet shqiptare jashtë kufijve të vendit, me synim ndërtimin e një partneriteti më të strukturuar dhe afatgjatë.