Në mbledhjen e Këshillit Kombëtar të Integrimit Europian (KKIE), të mbajtur më 1 korrik 2026, u diskutuan masat për mbrojtjen e hapësirës digjitale dhe luftën kundër piraterisë audiovizive. Kryetari i Grupit Parlamentar të Partisë Socialiste, Taulant Balla, vlerësoi se ndonëse legjislacioni shqiptar është përafruar me standardet e Bashkimit Europian, sfida mbetet zbatimi efektiv i ligjit.
Sipas Ballës, pirateria nuk është më vetëm një çështje e të drejtave të autorit, por një sfidë komplekse që prek sundimin e ligjit dhe ekonominë. Ai identifikoi disa nga format aktuale të këtij fenomeni:
- Platforma streaming;
- Shërbime pirate të IPTV;
- Serverë të vendosur jashtë juridiksionit shqiptar;
- Aplikacione dhe rrjete sociale që shpërndajnë përmbajtje në kohë reale.
Taulant Balla nënvizoi se këto praktika dëmtojnë autorët, artistët, gazetarët dhe operatorët mediatikë, duke deformuar konkurrencën në treg dhe duke ulur të ardhurat fiskale. Për të adresuar këto problematika, ai kërkoi një koordinim më të mirë ndërinstitucional, rritje të kapaciteteve teknike dhe bashkëpunim ndërkufitar, duke bërë thirrje për krijimin e një task-force të përbashkët.